સર્વે બાદ પીએમ મોદીની ઉંઘ ઉડી ગઈ છે, આમ આદમી પાર્ટીના કેન્દ્ર સરકાર પર પ્રહાર

આમ આદમી પાર્ટીના નેતા આતિશીએ વડાપ્રધાન નરેન્દ્ર મોદી અને ભાજપ પર પ્રહારો કર્યા છે. તેમણે કહ્યું છે કે એક ટીવી ચેનલે એક સર્વેમાં પૂછ્યું હતું કે શું 2024માં મોદી સામે કેજરીવાલને પડકાર માનવામાં આવે છે? 63% લોકોએ હામાં જવાબ આપ્યો. આ સર્વે આવ્યા બાદ મોદીજીની ઉંઘ ઉડી ગઈ છે.

આતિશીએ કહ્યું કે ભાજપની કેન્દ્રીય તપાસ એજન્સીઓ આજે સવારથી ફરી સક્રિય થઈ ગઈ છે. કોઈ રીતે કેજરીવાલની વધતી જતી લોકપ્રિયતાને રોકવા માંગે છે. આ સર્વે બાદ એજન્સીને જૂના કેસ બહાર કાઢવા માટે કહેવામાં આવ્યું છે. આમ આદમી પાર્ટીના પ્રવક્તાએ કહ્યું કે એલજીને કેજરીવાલના મંત્રીઓ પર કંઈક કરવાનું કહેવામાં આવ્યું હતું. જે બસ ખરીદવામાં આવી નથી, તેનું ટેન્ડરિંગ નથી થયું તો તેમાં ભ્રષ્ટાચાર કેવી રીતે થઈ શકે?

દિલ્હીના લેફ્ટનન્ટ ગવર્નર વી.કે. સક્સેનાએ DTC દ્વારા 1,000 લો-ફ્લોર બસોની ખરીદીમાં થયેલા કથિત ભ્રષ્ટાચારની તપાસ માટે CBIને ફરિયાદ મોકલવાની દરખાસ્તને મંજૂરી આપી છે. લેફ્ટનન્ટ ગવર્નરના નિર્ણય બાદ આમ આદમી પાર્ટીએ જોરદાર હુમલો કર્યો છે.

આમ આદમી પાર્ટીના નેતા સૌરભ ભારદ્વાજે કહ્યું છે કે લેફ્ટનન્ટ ગવર્નર વિનય સક્સેના દરરોજ સવારે મીડિયાને પોતાની જ દિલ્હી સરકાર વિરુદ્ધ સમાચાર આપી રહ્યા છે. એલજીની બંધારણીય જવાબદારી છે, પરંતુ તેઓ તેમની પોતાની સરકાર વિરુદ્ધ આવું કરી રહ્યા છે. અમે એ મુદ્દો ઉઠાવ્યો હતો કે જ્યારે તેઓ KVICના અધ્યક્ષ હતા, ત્યારે ખોટી રીતે જૂની નોટોને નવી નોટોમાં કન્વર્ટ કરી રહ્યા હતા. તેમના ચેરમેન રહીને તેમણે ખાદી ગ્રામોદ્યોગનું કામ તેમની પુત્રીને આપ્યું હતું.

તાજેતરમાં આમ આદમી પાર્ટીના નેતા સંજય સિંહે આ મુદ્દો ઉઠાવ્યો હતો કે વીકે સક્સેના KVICના ચેરમેન હતા ત્યારે ખાદી ગ્રામોદ્યોગના 4.55 લાખ કારીગરમાંથી માત્ર 1.95ને ખાતામાં ચૂકવવામાં આવ્યા હતા, બાકીની રકમ રોકડમાં ચૂકવવામાં આવી હતી અને ગેરરીતિનો આરોપ લગાવ્યો હતો.