સુરતમાં શાળા તોડી પંચાયતની ઓફિસ બનાવી, હાઈકોર્ટે રાજ્ય સરકારને ઝાટકી

સુરત જિલ્લાના ઓલપાડ તાલુકાના સાંધેરિયા ગામમાં સ્થિત સરકારી શાળાના રૂમ તોડી પાડીને ત્યાં પંચાયત માટે ઓફિસ બનાવવા સામે થયેલી જાહેરહિતની અરજીમાં, હાઈકોર્ટે રાજ્ય સરકારને ઝાટકતા કહ્યું છે કે, જો આ અંગે યોગ્ય નિર્ણય લેશો નહીં તો આ બાંધકામ સામે સ્ટે આપીશું

હાઈકોર્ટે સરકારને સવાલ કર્યો કે, પંચાયતની ઓફિસ બનાવવા માટે શાળાની મિલકતનો ઉપયોગ કેવી રીતે કર્યો ? શાળાના રૂમનો ઉપયોગ થતો નથી એટલે શું તેને તોડી પાડશો ? ભવિષ્યમાં એવુ બને કે હોસ્પિટલમાં દર્દીઓ નથી, તો શું હોસ્પિટલને તોડી પાડશો ? સરકારને ટકોર કરી છે કે, શાળાના ભોગે આ પ્રકારનુ બાંધકામ થઈ શકે નહીં. ભણવા માટે એક વિદ્યાર્થી આવતો હોય તો પણ શાળા ચલાવવાની રહેશે. હાઈકોર્ટે અરજદારેને પણ નિર્દેશ આપ્યો છે કે આ કેસમાં સુરત જિલ્લા પંચાયતને પક્ષકાર બનાવો. 

અરજદારના વકીલ ભાવિક આર. સમાની રજૂઆત હતી કે, આ શાળા વર્ષ 1937થી કાર્યરત છે. 2020માં સુરત જિલ્લા પંચાયતે પ્રસ્તાવ મૂકેલો આ શાળાના બે રૂમ તોડીને ત્યાં પંચાયતની ઓફિસ બનાવવી. જોકે, આ પ્રસ્તાવ ફગાવાયેલો અને કારણ એ અપાયેલુ કે ભવિષ્યમાં વધુ વિદ્યાર્થીઓ આ શાળામાં આવી શકે છે, જેથી આ રૂમની જરૂર પડશે. આ પછી, વર્ષ 2021માં ફરીથી આવો પ્રસ્તાવ મુકાયેલો અને તેને મંજૂર કરાયેલો. બીજી તરફ, સરકારની રજૂઆત હતી કે પાંચ જુલાઈ 2021ના રોજ સુરત જિલ્લા પંચાયતે આ ઠરાવ પસાર કરેલો અને પછી શાળાના આ બે મકાન તોડયા છે. આ રુમનો ઉપયોગ ન હોવાથી તેને તોડી પાડયા હતા.